《香港航空》商務客位初體驗，貴賓室篇（1）

       第一次搭乘香港航空去曼谷，就選商務位。理由一，係帶住老人家去旅行，想他們坐得舒服些。理由二，係只需要俾經濟客位多少少嘅價錢，就可以坐商務客位，何樂而不為？！

       如果要攞港航嘅商務客位跟《國泰航空》或《泰國航空》之類的航空公司去比較，似乎有點不公平。二千多元就坐商務，而且仲有幾個出發時段可選擇，仲想點？所以今次純粹用個人體驗去跟大家分享，夠竟二千多元的商務機票有甚麼服務。

    首先，坐商務去曼谷的好處是可以使用曼谷的優先通道入境和出境。當見到曼谷機場出入境關卡那條排到天荒地老嘅人龍，你就會慶幸自己肯花多少少錢去享受這個特別待遇係值得嘅！

       另一樣待遇，當然係享用機場貴賓室。香港航空在香港機場的貴賓室叫《紫荊堂》，位置毗鄰 23 號登機閘口。亦有人叫佢雞蛋仔 lounge, 因為可以品嚐即叫即製的雞蛋仔，仲有車仔麵。不要期望食物質素或飲品會有好多選擇，就當有一個地方可以免費食少少嘢同休息吓嘅地方就算。

        貴賓室内有不少職員，但服務一般，傾偈多過做。好似我想試玩貴賓室内的舊式磅重機，要求職員提供代幣，但應咗就算，冇咗件事。

        至於曼谷機場内的貴賓室叫 《Miracle》，是跟其他航空公司共用的。離境大堂內有兩間 《Miracle》，但只有一間有 Spa 服務。我去的那間，一進入機場禁區就見到D區，再下一層樓便是沒有 Spa 那間貴賓室。

       因為《紫荊堂》的體驗，所以都不期待曼谷這邊會有甚麼 miracle 來著。但一進入這間貴賓室，第一感覺是窗明几靜，設計簡潔。須然位置方便，但客人不多。食物和飲品的選擇也較紫荊堂多樣化，有即叫即做的泰式雞飯，雞絲湯米粉和泰式炒麵，職員也會主動幫忙點菜。

      配套服務講完，下次就分享一下在航機上的體驗。